PASTỌ AGWỌ UCHICHI

Pastọ Agwọ uchichi bụ Agụ-Owuru

Ma bụrụkwa ezigbo Senti nwa-Egbe

Agwọ Uchichi bụ adigboroja Pastọ

Ọ bu onye isi ndị niile neme ọkanga

Ma bụrụkwa Nna ndị ụgha niile

Ọ naghi ezu ori maọli maọli

Mana Ọ gafee, ihe efuo na-ogbe

Agwọ uchichi bu Agabaidu nke mbụ.

 

Agwọ uchichi nwere ngabasị ọjọọ

Ọ bụ Onye isi ndi Ajọ otu n’uwa niile

Nwoke a bụ soro okwu ọnụm

Ma Gi esokwala omumem niile

Eze Ndi I were nkaa, I riem ego

I were nkaaa, ego gi alaariela.

 

Onye hụrụ Pastọ ahụla okwu na ụka

Pastọ bụ anụ kpọrọ nkụ neju ọnụ

Pastọ bụ Ji ahụrụ n’ọkụ nefu ome

Ọ bụkwa dike anakpa ogwu n’anya

Bụrụkwa O ji Isi aghọ mkpụrụ mgbọ

Pastọ a bụkwa ezigbo ọnyika- ọdọrụ.

 

Ọ bụkwa Onye isi ndị O sochi egbụ

Agwọ uchichi bụ Ọ kwọm n’azụ ya,

Mana ụkwụm na-akpụ n’aja

Agwọ uchichi bụ meremere n’iru

Agwọ uchichi bụkwa gwọmpịtị n’azụ

Agwọ a bụ soro mụọ gbuo mmadụ

Ma soro mmadụ pụta izu akwa.

 

Agwọ uchichi jọkarịrị Udele na njọ

Ma sigbukwa nwa Nkapị n’Isi Isi ọjọọ

Agwọ a bụ ọ dị ime amụ arụrụmala

Abali agba aka nke mbụ gburugburu

Mkpị nsọ na agbalụ ọra nke mbụ

Arakata nke mbụ n’ụwa gburugburu.

 

Oziọma ya bụ, burunu baibụl n’amụ

Maka na ụwa niile nachọzikwa Ikpụ

Agwọ uchichi bụ kama ọ gadọ n’ite

Ka ọdọrọ n’afọ, ụwa a bụ ofu mbia

N’ụlọ awantilọ ka ebe obibi ya dị

Yana n’ụlọ ndị ụmụnwanyị ajadu

Agwọ uchichi bụ papa ịkwọkịrịkwọ.

 

Ajọ dibia a ji nsi na aja eme ọjị ụtụtụ

Pastọ Agwọ uchichi ji obi ya akọ nsi

O ji ọnụ ya atagbu, were obi akọcha

O yi awoọrọ atụrụ, nasị udo na ndụ

Ma nanị nsogbu na ọnwụ ka ọ nenye

Agwọ uchichi nezi oziọma Ala-Eze

Ma Ọ bụ Eze ndi ọjọọ, ndi arụrụmala.

 

© Ọnọchiengwu Ọbụna.